Newyddion Trelew - Digwyddiadau Arddangosfeydd, digwyddiadau diwylliannol a chwaraeon yn nhref Trelew Eisteddfod y Wladfa Yma ceir cystadlaethau barddoniaeth, rhyddiaith, celf, crefft, ffotograffiaeth, cerddoriaeth, adrodd, dawns a chanu corawl mewn Eisteddfod sy’n fynegiant o ddiwylliant a thraddodiadau Cymreig a dwyieithog y Wladfa Gymreig ym Mhatagonia. Gwobrwyir y Gadair i enillydd y prif gystadleuaeth farddoniaeth yn y Gymraeg, a’r Goron am farddoniaeth yn Sbaeneg, a rhaid aros hyd y diwedd er mwyn gweld a chlywed y prif gystadlaethau i gorau cymysg. Cynhelir yr Eisteddfod fel arfer ar ddiwedd mis Hydref. Gŵyl Ryngwladol Corau Cynhelir yr ŵyl hon bob dwy flynedd yn ystod mis Medi, ac mae hi’n ennill ei lle yng nghalendr gorawl y wlad a’r byd. Mae’n hybu’r traddodiad corawl yn yr ardal, yn yr Ariannin ac yn Ne’r Amerig a thrwy hyn yn atgyfnerthu’r cysylltiad rhwng pobl â’i gilydd ac wrth gwrs yn hyrwyddo Trelew ym maes celfyddyd a thwristiaeth. Ffair Amaethyddol a Ffair Wledig Gwelir yma ddefaid o bob math yn cael eu harddangos; standiau yn ymwneud â’r diwydiant amaeth a’i masnach; arddangosfeydd o’r cynnyrch ynghyd â sylwadau’r beirniaid, y gwobrau a tuag at y diwedd, ocsiwn. Yma cynhelir cystadlaethau cneifio a’r cyfan yn adlewyrchu awyrgylch unigryw y diwydiant amaeth yn yr ardal hon. "Expo" Trelew Arddangosfa fasnachol, ddiwylliannol a diwydiannol ydy hon sy’n hyrwyddo cynnyrch a photensial ein tref. Mae’n fan cwrdd i’r rhai sy’n gweithio yn y diwydiannau, yn y siopau ac i’r cwsmeriaid hefyd. Cynhelir sgyrsiau yma, arddangosfeydd o waith crefftwyr, cynnyrch y diwydiannau a sioeau dawns a cherddoriaeth. Gŵyl y Pengwin Cynhelir gwahanol weithgareddau addysgiadol, diwylliannol ac athletaidd gyda’r pwrpas o addysgu’r boblogaeth am yr adnoddau sydd ar gael am Bengwiniaid Magellan a Gwarchodfa Natur Punta Tombo a’u pwysigrwydd i dref Trelew. Pen-blwydd y Dref Cynhelir gweithgareddau amrywiol er mwyn dathlu pen-blwydd tref Trelew drwy gydol mis Hydref, ac ar yr 20fed yn arbennig. Ymysg pethau eraill gwelir arddangosfeydd o luniau, mabolgampau a chyngherddau, a’r cyfan yn cyrraedd uchafbwynt gydag ethol brenhines Trelew. Cystadlaethau Chwaraeon Mae taith genedlaethol ceir rasio "Mar y Valle" (Môr a Dyffryn) yn dod i Drelew yn gyson gyda’u ceir o wahanol gategorïau (Turismo Carretera a 3 litr). Yn ogystal â hyn cynhelir cystadlaethau eraill yn gyson, rhai o rhain yn cael eu darlledu’n genedlaethol megis pêl-droed, pêl-fasged, pêl-foli, hoci ac ati.