Trefnu eich taith Llety Mae gan Trelew lety i siwtio pob math o chwaeth a phob math o bocedi – o wersylloedd i westai da, yr unig beth sy’n rhaid ei wneud ydy mynd i’r swyddfa dwristiaeth a holi am y rhestrau llety ac yna dewis yr hyn sydd orau i chi. Mae’r amrywiaeth yn golygu y gallwch ddewis llety gyda llefydd parcio os ydych yn teithio gyda char, gwesty gyda thŷ bwyta neu westy wedi ei rannu yn fflatiau gyda chyfleusterau cartref (apart hotel). Does dim ots beth ddewiswch chi, mi gewch y sylw a’r croeso gorau posibl ond awgrymwn eich bod yn bwcio digon o flaen llaw rhag cael eich siomi. (Cliciwch yma i weld gwestai) Bwyd Gyda machlud yr haul mae Trelew yn barod i fagu nerth newydd ar ôl gwaith y dydd. Y ffordd orau o gloi diwrnod prysur yng nghanol byd natur ydy gyda phryd da o fwyd arbennig ac yma mae’r arlwy yn amrywio o fwyd brys i fwyd gourmet. Mae coginio patagonaidd wedi ennill ei le yn genedlaethol ac yn fyd-eang erbyn hyn oherwydd ei ddefnydd o gynnyrch gorau yr ardal. Gwelwch gig oen enwog Patagonia wedi ei goginio ar y groes o flaen tân (asado), pysgod, bwyd môr, efallai gyda saws arbennig, amrywiaeth o bicls, ac yna pwdinau wedi eu gwneud o’r cynhwysion lleol gorau – mae rhywbeth at ddant pob un ohonoch chi. Hwyl Mae natur arbennig i fywyd nos yng nghanol y dref a fedrwch chi ddim ymweld â phob caffi neu far mewn un noson yn unig. Mae hwyl i’w gael ar gyfer pob math o chwaeth ac efallai mai i’r casino yr ewch gyda’i ddifyrrwch arbennig – gyda’r dechnoleg ddiweddaraf mewn awyrgylch foethus a hyd yn oed lle bwyta ardderchog a sioeau cerddorol amrywiol. Mynd allan Roedd cerddoriaeth yn bwysig iawn i sefydlwyr Trelew ac mae hyn wedi treiddio i bob agwedd o fywyd y dref ers y cychwyn. Os mai celfyddyd yw’r hyn sy’n mynd â’ch bryd yna rhaid ymweld ag Amgueddfa Celfyddyd Weledol Cyngor y Dref (Museo Municipal de Artes Visuales), Canolfan y Celfyddydau, llefydd sydd yn adlewyrchu’r parch sydd i artistiaid lleol a phobl greadigol. Chwiliwch am raglenni’r llefydd hyn er mwyn gweld os oes gweithgareddau, arddangosfeydd neu hyd yn oed ddramâu sy’n apelio atoch yma. Gallwch gofrestri gyda’n cylchlythyr er mwyn derbyn manylion y digwyddiadau hyn. Crefftau Lleol Does dim modd ymweld â Threlew heb brofi Teisen Ddu Patagonia. Yn y dref mae’r ffatri gyntaf a grëwyd er mwyn cynhyrchu’r gacen ffrwythau hon sydd mor nodweddiadol o’r ardal gyfan. Mae’n cael ei pharatoi yn ôl hen ryseitiau cyndeidiau’r Cymry a greodd y deisen faethlon hon gyda’r ychydig gynhwysion oedd ar gael iddynt ar y pryd. Erbyn heddiw mae’r deisen wedi datblygu yn gynnyrch lleol nodweddiadol ac unigryw sy’n cael cydnabyddiaeth genedlaethol a rhyngwladol. Ar gael yn y siopau lleol mae ponchos, sgarffiau a gwasgodau o wlân o’r ansawdd gorau wedi eu cynhyrchu gan grefftwyr lleol. Mae’n arwydd gweladwy o’r cyswllt rhwng y brodorion gwreiddiol a’r Gwladfawyr a’r gwerth a roddant i wlân. Drwy ddefnyddio technegau gwahanol o greu’r gwlân a’i wau maent yn llwyddo i greu dillad trawiadol o ansawdd arbennig. Mae’r cynhyrchion hyn, fel y crefftau lledr, gemwaith a chrochenwaith, drwy eu lliwiau ac ansawdd yn adlewyrchu eu gwreiddiau Patagonaidd ac yn anrhegion neu gofroddion perffaith i’w cario adref i gofio am eich taith i’r paith pell. Os dymunwch dderbyn mwy o wybodaeth yna llenwch ein ffurflen gysylltu.